Yaqin Sharqdan 5 mingdan ortiq o‘zbekistonlik vatanga qaytarildi
Bugungi kun holatiga ko‘ra, 21 ta parvoz orqali Madina va Jidda aeroportlaridan 4 948 nafar, Dubaydan esa 235 nafar yo‘lovchi O‘zbekistonga olib kelingan.
Yaqin Sharq mintaqasida keskinlik kuchaygani ortidan besh mingdan ortiq O‘zbekiston fuqarosi qaytarildi. Bu haqda Transport vazirligi axborot xizmati xabar berdi.
Mintaqada davom etayotgan harbiy nizo sababli Bahrayn, Quvayt, Suriya, Iroq, Eron, Qatar, Isroil, Iordaniya, BAA va Livan havo hududlari parvozlar uchun turli muddatlarga yopiq bo‘lib qolmoqda.
Ma’lumotlarga ko‘ra, 28-fevraldan boshlab O‘zbekiston shaharlaridan Dubay, Sharja, Madina, Doxa, Jidda, Tel-Aviv, Tehron va Quvayt yo‘nalishlaridagi barcha aviaqatnovlar bekor qilindi. Natijada 28-fevraldan 2-martga qadar Quvayt, Isroil, Saudiya Arabistoni, Qatar va BAAdan jami 1 681 nafar O‘zbekiston fuqarosi o‘z vataniga ucholmagan.
Prezident Shavkat Mirziyoyevning topshirig‘i bilan Transport vazirligi rezident va xorijiy aviakompaniyalar bilan aniq rejalarni ishlab chiqdi. Ishlarni muvofiqlashtirish maqsadida “O‘zaviatsiya” agentligida 24/7 ishlaydigan maxsus shtab tashkil qilindi. Qator mamlakatlarning havo hududi yopiq bo‘lishi va vaziyat o‘zgarib borayotganligi, shuningdek, xorijiy aviatsiya idoralari bilan olib borilgan muzokaralar natijalari hisobga olingan holda aviakompaniyalarga parvozlarni amalga oshirishda qat’iy talablar belgilandi.
Hozirgi vaqtda rezident va norezident aviakompaniyalar 2026-yil 28-fevralgacha jo‘nab ketgan yo‘lovchilarni O‘zbekistonga qaytarish uchun parvozlarni amalga oshirmoqda. Bugungi kun holatiga ko‘ra, 21 ta parvoz orqali Madina va Jidda aeroportlaridan 4 948 nafar, Dubaydan esa 235 nafar yo‘lovchi O‘zbekistonga olib kelingan.
Transport vazirligi yo‘lovchilarga parvozlar haqida ma’lumot olishda faqat aviakompaniyalarning rasmiy vakolatxonalari va ularning veb-saytlarida ko‘rsatilgan telefon raqamlariga murojaat qilishni tavsiya qilmoqda.
Shuningdek, vazirlik xabarida fuqarolar tekshirilmagan vositachilarga murojaat qilish moliyaviy va boshqa xavf-xatarlarni keltirib chiqarishi mumkinligi haqida ogohlantirilgan.
Yo‘lovchilarga yordam ko‘rsatish maqsadida “O‘zaviatsiya” agentligining call-markazi 24/7 ishlaydi: +998 (78) 120-00-72, +998 (71) 200-07-65.
