Yaqin Sharqdagi voqealarda halok bo‘lganlar orasida O‘zbekiston fuqarolari yo‘q — TIV
Saudiya Arabistonidan evakuatsiya davom etmoqda, BAA’dan repatriatsiya reysi rejalashtirilgan.
O‘zbekiston Tashqi ishlar vazirligi Yaqin Sharqdagi vaziyat yuzasidan ma’lumot berdi.
Vazirlik matbuot xizmatining xabar qilishicha, hozirgi paytga qadar Oʻzbekiston fuqarolari orasida halok bo‘lganlar yoki jarohat olganlar qayd etilmagan. Vaziyat doimiy ravishda nazorat ostida ekani ta’kidlandi.
Qayd etilishicha, Shavkat Mirziyoyev topshirig‘iga binoan, Yaqin Sharq mamlakatlarida bo‘lib turgan vatandoshlarning Vatanga qaytishini ta’minlash bo‘yicha tizimli chora-tadbirlar amalga oshirilmoqda.
Vaziyatdagi o‘zgarishlar hamda fuqarolar xavfsizligini ta’minlash ustuvorligi hisobga olinib, muntazam va qo‘shimcha aviareyslar tashkil etilmoqda. Bu boradagi ishlar izchil davom ettirilayotgani bildirildi.
Xususan, Saudiya Arabistoni hududidan fuqarolarni tizimli ravishda evakuatsiya qilish ishlari olib borilmoqda. Shuningdek, Uzbekistan Airways aviakompaniyasining BAAdan repatriatsiya reysi amalga oshirilishi rejalashtirilgan.
Bundan tashqari, charter reyslarini tashkil etish masalasi aviakompaniyalar hamda mintaqa davlatlarining aviatsiya regulyatorlari bilan muvofiqlashtirilmoqda.
Vazirlik ayrim hududlarda havo maydonining yopilishi hamda “havo hujumi” rejimi joriy etilgani sababli imkoniyatlar cheklanganini qayd etib, shunga qaramay fuqarolar xavfsizligini ta’minlash va ularni Vatanga qaytarish bo‘yicha ishlar tunu kun davom etayotganini ma’lum qildi.
