Yovvoyi tabiat ortidagi mehr: Toshkentda minglab yoshlar ekologiya uchun birlashdi

3-mart kuni mamlakat bo‘ylab “Butunjahon yovvoyi tabiat kuni” keng nishonlandi.

 

Sana munosabati bilan Toshkent hayvonot bog‘ida yovvoyi flora va fauna vakillarini asrashga qaratilgan yirik ekologik tadbir tashkil etildi. Tadbir Ekologiya va iqlim o‘zgarishi milliy qo‘mitasi, Global ekologik fond, BMT Taraqqiyot dasturi, Yoshlar ishlari agentligi, Volontyorlar assotsiatsiyasi hamda Toshkent hayvonot bog‘i hamkorligida o‘tkazildi.

 

Unda poytaxtdan 100 nafardan ortiq yosh ekofaollar, respublika bo‘yicha esa qariyb 2000 nafar yoshlar ishtirok etdi. Tadbirning asosiy qismi sifatida yoshlar o‘rtasida “Eko-kvest” intellektual o‘yini tashkil etildi. Unda Toshkent shahrining turli tumanlaridan tuzilgan jamoalar ekologiya, atrof-muhitni muhofaza qilish hamda yovvoyi tabiatni asrashga oid savol va topshiriqlarni bajardi.

 

Yakuniy natijalarga ko‘ra, 1-o‘rin Mirobod, Yakkasaroy va Olmazor tumanlari jamoalariga nasib etdi. 2-o‘rinni Bektemir hamda Yangihayot tumanlari egalladi. 3-o‘rin esa Mirzo Ulug‘bek va Uchtepa tumanlari jamoalariga berildi.

 

Shuningdek, nominatsiyalar bo‘yicha ham g‘oliblar aniqlandi. Yunusobod tumani “Intellektual jamoa”, Chilonzor tumani “Yashil qahramonlar”, Shayxontohur tumani “Ekologik topqirlar”, Sergeli tumani esa “Eng kreativ jamoa” deb topildi.

 

Tadbir davomida hayvonot bog‘idagi yovvoyi fauna vakillarini oziqlantirish va parvarishlashga qaratilgan amaliy aksiyalar ham o‘tkazildi. Shu bilan birga, “Eko-kvest” o‘yinlari Farg‘ona va Surxondaryo viloyatlaridagi hayvonot bog‘larida hamda boshqa hududlardagi xiyobonlarda ham tashkil etildi.