Aliyev Eronning Naxchivonga uchirilgan dron hujumini terroristik hujum deb atadi
Ozarbayjon Tehrondan tushuntirish va rasmiy uzr talab qilmoqda.
Ozarbayjon prezidenti Ilhom Aliyev Naxchivon avtonom Respublikasiga qilingan dron hujumini terroristik harakat deb atadi deb xabar beradi APA.
Davlat rahbarining ma’lum qilishicha, dronlar Eron hududidan uchirilgan va faqat tinch aholi nishonlariga — xalqaro aeroport, terminal binosi va maktabga qaratilgan.
"Bu xoin hujum va terrorchilik harakati. Biz Tehrondan nafaqat tushuntirish, balki rasmiy uzr kutamiz", — dedi Aliyev va hodisada aybdorlar jazolanishini talab qildi.
Hodisaga javoban Boku oʻz qurolli kuchlari, chegara qo‘riqchilari va maxsus birliklarini to‘liq jangovar holatga keltirdi. Qurolli kuchlar allaqachon qarshi choralar paketini tayyorlash boʻyicha buyruq olgan.
Eron esa ayblovlarni qat’iyan rad etmoqda. Mamlakat ommaviy axborot vositalari va Tashqi ishlar vazirligi Eron kuchlari Ozarbayjonga zarba bermaganini va Turkiya ustidan ushlangan raketaga aloqasi yo‘qligini da’vo qilmoqda.
Eslatib o‘tamiz, 5-mart kuni Eron dronlari Naxchivan xalqaro aeroportining terminal binosiga zarba berib, yana bir dron Shakerobod qishlog‘idagi maktab yaqinida qulagan. Hodisa natijasida ikki tinch aholi vakili jarohat olgan va ularga tibbiy yordam ko‘rsatilgan.
