AQSH Erondagi qizlar maktabiga berilgan zarbani tekshirmoqda
Qo‘shma Shtatlar tinch aholini nishonga olmasligi aytilmoqda.
Oq uy Erondagi qizlar maktabiga qilingan hujum yuzasidan tekshiruv olib bormoqda. Bu haqda AQSH mudofaa vaziri Pet Hegsetga tayanib, CNN xabar berdi.
Isroil va Qo‘shma Shtatlar 28-fevral kuni Minab shahridagi qizlar maktabiga aviazarba bergan edi. Hujum oqibatida 160 dan ortiq kishi halok bo‘lgan. Qurbonlar orasida 7–12 yoshdagi qizlar ham bo‘lgan. Halok bo‘lganlarni dafn etish marosimi 3-mart kuni Eronda ommaviy tarzda o‘tkazilgan.
“Men hozir ayta oladigan yagona narsa shuki, biz bu hodisani tekshiryapmiz. Biz hech qachon tinch aholini nishonga olmaymiz, biroq voqea yuzasidan tekshiruv olib borilmoqda”, — dedi Hegset.
Shuningdek, BMT inson huquqlari bo‘yicha idorasi 3-mart kuni Erondagi qizlar maktabiga qilingan hujum yuzasidan mustaqil tergov o‘tkazishga chaqirdi. Biroq tashkilot hujum uchun kim javobgar ekanini ochiqlamadi.
Avvalroq 2-mart kuni AQSH davlat kotibi Marko Rubio AQSH harbiylari maktabni ataylab nishonga olmaganini bildirgan edi. Shu bilan birga, Isroil avval ham G‘azo sektoridagi urush davomida tinch aholiga qilingan ayrim zarbalarni dastlab rad etib, keyinchalik ularni “tasodifiy hodisa” deb izohlab kelgan.
AQSH va Isroilning Eronga qarshi harbiy amaliyoti hamda Eron oliy rahbari Ali Xomanaiyning o‘ldirilishi ortidan boshlangan mojaro davomida 900 dan ortiq kishi halok bo‘lgani aytilmoqda. Eron esa bunga javoban mintaqadagi AQSH harbiy bazalari va obyektlariga zarbalar bermoqda.
