Eron atrofidagi harbiy zarbalar xalqaro huquqqa zid — BMT

BMTning mustaqil xalqaro faktlarni aniqlash missiyasi AQSh va Isroil tomonidan Eronga qarshi amalga oshirilgan harbiy harakatlarni, shuningdek, Tehronning mintaqa davlatlariga qaratilgan javob zarbalarini qoraladi. Tegishli bayonot 4-mart kuni e’lon qilingan.

 

Missiya mutaxassislarining ta’kidlashicha, kuch ishlatish holatlari xalqaro huquq tamoyillariga, xususan, BMT Nizomiga zid bo‘lib, mamlakatdagi gumanitar vaziyatning yanada og‘irlashishiga olib kelishi mumkin.

 

Bayonotda qayd etilishicha, Eron aholisi bir tomondan tashqi harbiy bosim, ikkinchi tomondan esa ichki repressiyalar o‘rtasida murakkab sharoitda qolmoqda. Mutaxassislar mamlakatda inson huquqlarining buzilishi bilan bog‘liq uzoq yillik muammolar mavjudligini ham eslatib o‘tgan.

 

Missiya ayniqsa Minab shahrida sodir bo‘lgan fojiaga oid xabarlardan chuqur xavotir bildirgan. Dastlabki ma’lumotlarga ko‘ra, qizlar maktabiga uyushtirilgan hujum oqibatida 150 dan ortiq kishi halok bo‘lgan. Qurbonlarning aksariyatini 7–12 yoshli bolalar tashkil etgani qayd etilmoqda.

 

Shuningdek, bayonotda AQSh va Isroil tomonidan Eron rasmiylariga qarshi amalga oshirilgan havo zarbalari ham tanqid qilindi.

 

Mutaxassislar sudsiz qotilliklarni “adolatning qabul qilib bo‘lmaydigan vositasi” deb baholab, bunday amaliyot xalqaro huquq normalariga zid ekanini ta’kidladi.

 

Bundan tashqari, Eronning qo‘shni davlatlarga nisbatan amalga oshirgan javob zarbalari ham xavotir uyg‘otayotgani qayd etilgan. Missiya ma’lumotlariga ko‘ra, bunday harakatlar tinch aholining qurbon bo‘lishi hamda fuqarolik infratuzilmasining vayron bo‘lishiga olib kelmoqda.

 

Mutaxassislar, shuningdek, Eron 2025-yil 28-dekabrda boshlangan norozilik namoyishlarining keskin bostirilishi oqibatlaridan hali ham to‘liq tiklanmaganini ham ta’kidlab o‘tgan.