Eron Turkiya hududiga raketa uchirganini rad etdi, Anqara esa javob berishga tayyorligini e’lon qildi

Turkiya Prezidenti ma’muriyati Aloqa boshqarmasi rahbari Burhanettin Duranning so‘zlariga ko‘ra, Turkiya hududiga raketa qoldiqlari qulaganidan so‘ng, Anqara javob berishga tayyorligini bildirdi.

 

“Hududimiz va havo makonimizni himoya qilish uchun zarur bo‘lgan barcha choralar ikkilanmasdan ko‘riladi. Mamlakatimizga nisbatan yuzaga kelishi mumkin bo‘lgan dushmanlarcha harakatlarga xalqaro huquq doirasida tegishli javob beriladi. Shu bilan birga, bu jarayonda NATO va ittifoqchilarimiz bilan maslahatlashuv va hamkorlik davom ettiriladi”, — deb bayonot berdi Turkiya Prezidenti ma’muriyati Aloqa boshqarmasi rahbari Burhanettin Duran.

 

Shuningdek, Duran barcha tomonlarni mintaqada keskinlikni oshirishi yoki mojaroni yanada kengroq hududlarga yoyilishiga olib kelishi mumkin bo‘lgan harakatlardan tiyilishga chaqirdi. 

 

Eron Qurolli Kuchlarining Bosh shtabi Turkiya hududiga raketa yo‘naltirilgani haqida tarqalgan xabarlarni rad etdi va rasman bunday zarba berilmaganini ma’lum qildi. Bosh shtab bayonotida aytilishicha, Eron armiyasi Turkiyaning suverenitetini to‘la hurmat qiladi va mamlakatga qarata hech qanday raketa uchirilmagan yoki urush harakati qilinmagan.

 

Avvalroq, Erondan uchirilgan ballistik raketa Sharqiy O‘rta yer dengizídagi NATO havo va raketaga qarshi mudofaa bo‘linmalari tomonidan to‘xtatilgani xabar qilingan edi.

 

Raketaning yo‘li Iroq va Suriya havo hududlari orqali Turkiya tomon yo‘naltirilgan edi. Hodisa natijasida yerga tushgan parchalardan ayrimlari Hatay viloyati, Do‘rtyol tumani hududiga yetib borgan. Hodisa oqibatida hech kim jabrlanmagan.