Iroq butunlay elektr energiyasidan uzildi
Basra viloyatidagi muhim Rumeyla elektr stansiyasida kutilmagan nosozlik blekautga sabab bo‘ldi.
4- mart kuni Iroqning barcha viloyatlarida elektr energiyasida uzilish kuzatildi. Bu haqda mamlakat Elektr energetikasi vazirligiga tayanib, Deutsche Welle xabar berdi.
Keyinchalik vazirlik blekaut Basra viloyatidagi Rumeyla elektr stansiyasida gaz hajmining kutilmaganda kamayishi bilan bog‘liq texnik nosozlik sabab yuzaga kelganini bildirdi. Stansiyada quvvat keskin 1900 megavattga tushib, elektr o‘chishiga sabab bo‘lgan.
Guvohlar tomonidan suratga olingan va ijtimoiy tarmoqlarda tarqatilgan videolarga qaraganda, ba’zi uylar hali ham elektr bilan ta’minlangan, ammo ko‘chalar butunlay chiroqsiz qolgan.
Iroq agentligi INA xabar berishicha, yaqinda Eron tomonidan bir necha marta hujumlarga uchragan elektr stansiyalari va uzatish liniyalarida tiklash ishlari olib borilmoqda.
Ushbu voqea AQSh va Isroilning Eronga qarshi urushining beshinchi kunida sodir bo‘ldi. Ikkala davlat 28 fevral tongida Eron hududiga zarbalar berdi.
Eron esa javoban Isroil va Fors ko‘rfazidagi bir necha davlatlarga zarba yo‘lladi, jumladan Iroqdagi Erbil aeroporti yaqiniga ham. Tehron esa arab davlatlari bilan urush olib bormayotganini, faqat mintaqadagi AQSh harbiy bazalarini nishonga olayotganini ta’kidlamoqda.
