Marg‘ilondagi maktabda ayolni do'pposlagan erkakka nisbatan jinoyat ishi qo‘zg‘atildi
Dastlab erkak ayolning farzandini urayotgan bo‘lgan.
Ijtimoiy tarmoqlarda Marg‘ilondagi maktabda erkak bir ayolni urayotgani aks etgan video tarqalgan edi. Farg‘ona viloyati IIB axborot xizmati mazkur holat yuzasidan jinoyat ishi ochilganini ma’lum qildi.
Ma’lum bo‘lishicha, 2-mart kuni fuqaro M.K. Marg‘ilon shahar, Istiqlol mahallasidagi 25-umumiy o‘rta ta’lim maktabiga 5-sinfida o‘qiydigan o‘g‘li M.E.ni ko‘rgani borgan vaqtida, fuqaro J.X. uning farzandini do‘pposlab urayotganligini ko‘rib, ajratmoqchi bo‘lgan. Biroq, fuqaro J.X. bezorilik harakatlarini davom ettirib, M.K. va M.E. ni badanining turli joylariga urib, qasddan tan jarohati yetkazgan.
Qayd etilishicha, ushbu holat yuzasidan J.X.ga nisbatan Marg‘ilon shahar IIB tomonidan Jinoyat kodeksining 277-moddasi 3-qismi “g” bandi bilan jinoyat ishi qo‘zg‘atilib, Jinoyat protsessual kodeksining 221-moddasi tartibida ushlandi.
