Namanganda Telegram orqali bolalar pornografiyasini tarqatgan shaxs qo‘lga olindi
U guruh a’zolaridan 8–10 ming so‘mgacha pul talab qilib, noqonuniy kontentni 120 nafar foydalanuvchiga tarqatgan.
Namanganda huquqni muhofaza qiluvchi organlar tomonidan o‘tkazilgan tezkor tadbirlar davomida Telegram messenjeri orqali voyaga yetmaganlar ishtirokidagi pornografik materiallarni tarqatgan shaxs qo‘lga olindi. Bu haqda viloyat ichki ishlar organlari matbuot xizmati ma’lum qildi.
Ma’lum qilinishicha, Namangan tumanida yashovchi fuqaro messenjer ilovasida maxsus guruh tashkil etib, unda voyaga yetmaganlar ishtirokidagi pornografik materiallarni namoyish etish va tarqatish bilan shug‘ullangan.
Aniqlanishicha, gumonlanuvchi guruh a’zolaridan har biri uchun bank kartasiga 8 mingdan 10 ming so‘mgacha pul o‘tkazib berishni talab qilgan. Dastlabki ma’lumotlarga ko‘ra, u mazkur noqonuniy materiallarni jami 120 nafar foydalanuvchiga tarqatgan.
Mazkur holat yuzasidan gumonlanuvchiga nisbatan O‘zbekiston Respublikasi Jinoyat kodeksining 130-moddasi 3-qismi (pornografik mahsulotlarni ishlab chiqarish, olib kirish, tarqatish, reklama qilish yoki namoyish etish) bilan jinoyat ishi qo‘zg‘atildi.
Hozirda mazkur holat bo‘yicha tergov harakatlari olib borilmoqda.
