O‘zbekiston Milliy media birlashmasi boshqaruvi raisi o‘zgardi
Tojiyev Odiljon Fotihjon o‘g‘li O‘zbekiston Milliy media birlashmasi boshqaruvi raisi lavozimiga tayinlandi.
O‘zbekiston Milliy media birlashmasi boshqaruvi raisi etib, Sherzodxon Tojiddinxon o‘g‘li Qudratxo‘janing o‘rniga Tojiyev Odiljon Fotihjon o‘g‘li tayinlandi.
Ma’lumotlarga ko‘ra, Odiljon Fotihjon o‘g‘li Tojiyev davlat boshqaruvi tizimida turli mas’ul lavozimlarda faoliyat yuritgan. Jumladan, u Toshkent viloyati hokimi o‘rinbosari, Oliy Majlis Qonunchilik palatasi deputati, Qonunchilik palatasi Spikerining raqamli rivojlanish va axborot siyosati masalalari bo‘yicha o‘rinbosari sifatida ko‘p yillar samarali ish olib borgan.
O.Tojiyev jamoatchilik bilan faol ishlaydigan, OAV sohasidagi qonunchilikni chuqur biladigan, axborot siyosati va raqamli rivojlanish yo‘nalishlarida katta tajribaga ega mutaxassis sifatida tanilgan.
Shuningdek, u zamonaviy media maydonda ochiq muloqot madaniyatini rivojlantirish, media sohasini takomillashtirish masalalariga alohida e’tibor qaratib kelgan.
