O‘zbekiston qalbaki dorilar aylanmasiga qarshi kurash keskin kuchaytiriladi
O‘tgan yil davomida 57 mingdan ortiq kontrafakt dorilar aniqlangan, 21 turdagi xorijiy dorilar O‘zbekistonga kirishi to‘xtatilgan.
Prezident Shavkat Mirziyoyev 5-mart kuni farmatsevtika sohasini rivojlantirish va sifatsiz dorilar aylanmasiga qarshi kurashni kuchaytirishga bag‘ishlangan videoselektor yig‘ilishida mas’ullarga aniq topshiriqlar berdi.
Davlat rahbari dorilarning noqonuniy aylanmasi bo‘yicha giyohvand va psixotrop moddalarga qarshi olib borilayotgan qat’iy choralar kabi keskin kurash olib borilishini ta’kidladi. Qayd etilishicha, o‘tgan yil davomida 57 mingdan ortiq ro‘yxatdan o‘tmagan kontrafakt dorilar aniqlangan va natijada 21 turdagi nufuzli xorijiy kompaniya o‘z dorilarini O‘zbekistonga yetkazishni to‘xtatgan.
Prezident shuningdek, sifatsiz va qalbaki dorilar savdosi uchun javobgarlikni oshirish bo‘yicha yangi qonun loyihasini ishlab chiqish muhimligini ta’kidladi.
Yig‘ilishda farmatsevtika sohasidagi ilmiy salohiyat ham ko‘rib chiqildi. Hozirda 6 ta ilmiy-tadqiqot institutida 300 dan ziyod olimlar faoliyat yuritmoqda, yiliga esa 1 mingga yaqin yoshlar farmatsevtika oliygohlarini tamomlamoqda. Shu bilan birga, sanoat va ilm-fan o‘rtasidagi uzilish muammosi qayd etildi.
Shu munosabat bilan Kimyo-farmatsevtika, Vaksina va zardoblar hamda Sharq tabobati institutlari negizida Milliy biofarmatsevtika ilmiy-tadqiqot instituti tashkil etiladi. Institut Toshkent farma park hududida joylashib, olimlarga klinikoldi, bio va kimyo laboratoriyalari hamda 250 o‘rinli xalqaro klinik tadqiqotlar markazi orqali ilmiy ishlarga imkon yaratadi.
Prezident Mirziyoyev farmatsevtika sohasini modernizatsiya qilish va xorijiy sarmoyalarni jalb qilish borasidagi ishlarni davom ettirish zarurligini ta’kidladi.
