O‘zbekiston tashqi ishlar vaziri Baxtiyor Saidov Ozarbayjon tashqi ishlar vaziri Jeyhun Bayramov bilan telefon orqali muloqot o‘tkazdi
Ikki mamlakat tashqi ishlar vazirlari Naxchivanga qilingan hujum masalasini muhokama qildi.
O‘zbekiston Tashqi ishlar vazirligining ma’lum qilishicha, Baxtiyor Saidov Jeyhun Bayramov bilan Ozarbayjondagi holat yuzasidan muloqot o‘tkazgan.
Suhbat chog‘ida Bayramov Naxchivan Avtonom Respublikasi hududida dronlar bilan amalga oshirilgan hujum bo‘yicha batafsil ma’lumot berdi. Mazkur hujum natijasida tinch aholi jabrlangani va fuqarolik infratuzilmasiga zarar yetganligi qayd etildi.
O‘zbekiston tomoni ushbu hujumlar yuzasidan jiddiy xavotir bildirdi. Shuningdek, xalqaro huquq prinsiplari va boshqa davlatlarning suvereniteti hamda hududiy yaxlitligini buzadigan bunday harakatlar mutlaqo qabul qilib bo‘lmasligi ta’kidlandi.
