Tolibon Qandahorda Pokistonning 7 ta harbiy postini egalladi

Tolibon ma’muriyati Mudofaa vazirligi “Radd az-Zulm” (“Zulmga qarshi kurash”) nomli operatsiya davomida Qandahor viloyati hududida Pokiston harbiylariga tegishli yettita chegara posti nazoratga olinganini e’lon qildi.

 

Afg‘oniston tomoni ma’lumotlariga ko‘ra, operatsiyada 205-“Al-Badr” korpusining 6-chegara brigadasi ishtirok etgan. Harbiylar postlarni egallab, u yerdagi qurol-yarog‘ va o‘q-dorilarni musodara qilgani, Pokiston harbiy xizmatchilari orasida halok bo‘lganlar va jarohatlanganlar borligi aytilmoqda. Biroq Islomobod ushbu ma’lumotlarni hozircha tasdiqlagani yo‘q.

 

Vaziyat so‘nggi kunlarda keskinlashgan. Avvalroq Pokiston kuchlari Kobul, Qandahor va chegara hududlaridagi ayrim nishonlarga havo zarbalari bergan edi. Pokiston tomoni bu hujumlarni Tehrik‑e Tolibon Pokiston (TTP) jangarilari joylashgan lagerlarga qarshi “G‘azab lil-Haq” (“Haqiqat uchun g‘azab”) operatsiyasi doirasida amalga oshirilganini ma’lum qilgan.

 

Jangovar harakatlar davom etayotgan bir paytda, xalqaro tashkilotlar va BMTning Afg‘onistondagi missiyasi — UNAMA tinch aholi orasida qurbonlar soni ortib borayotganidan xavotir bildirmoqda. BMT ma’lumotlariga ko‘ra, 2026-yil 4-mart holatiga eskalatsiya boshlanganidan beri kamida 42 nafar tinch aholi vakili halok bo‘lgan, 100 dan ortiq kishi jarohatlangan.

 

Ayni paytda Durand chizig‘i bo‘ylab bir nechta hududlarda to‘qnashuvlar davom etmoqda. Xususan, Xost viloyati, Paktika viloyati va Kunar viloyati hududlarida vaziyat keskinligicha qolmoqda.