TOP-300 oliygohlarga kirgan yoshlar va pedagoglarga 20 ming dollargacha ta’lim krediti beriladi
Kreditning asosiy qarzi talabaning rasmiy o‘qish muddati tugagandan so‘ng yettinchi oydan boshlab yetti yil davomida qaytariladi.
Hukumatning 2-martdagi 88-sonli qarori bilan “Xorijiy oliy ta’lim tashkilotlarida o‘qish istagidagi yoshlar va pedagog xodimlarga ta’lim kreditini ajratish tartibi to‘g‘risida”gi nizom tasdiqlandi.
Nizom Ta’lim kreditini moliyalashtirish jamg‘armasi hisobidan imtiyozli ta’lim kreditini ajratish va ularni qaytarish tartibini belgilaydi.
Nizomga ko‘ra, QS (Quacquarelli Symonds) yoki THE (The Times Higher Education) bo‘yicha TOP-300 talikka kiritilgan xorijiy oliy ta’lim tashkilotlariga o‘qishga qabul qilingan 30 yoshdan oshmagan, jumladan 30 yoshdan bo‘lgan yoshlar va pedagoglarga ajratiladi. Kredit oluvchilar O‘zbekiston fuqarosi bo‘lishi talab qilinadi.
Kredit 1 o‘quv yili uchun 20 ming AQSH dollarigacha miqdordagi ekvivalentda milliy valyutada talabalarning bakalavriat hamda magistratura dasturlarida o‘qishi uchun beriladi. Kreditning asosiy qarzi talabaning rasmiy o‘qish muddati tugagandan so‘ng 7 oydan boshlab 7 yil davomida qaytariladi.
Kredit oluvchi bankka murojaat qilishda ariza, shaxsni tasdiqlovchi hujjatlar nusxasi, taklifnoma-xat (1-kurslar uchun), 2-kursdan boshlab akademik o‘zlashtirish natijalari, to‘lov-kontrakt asosida o‘qish bo‘yicha shartnoma hamda oliy ta’lim tashkilotining bank rekvizitlari ko‘rsatilgan invoys taqdim etishi kerak bo‘ladi.
Shu bilan birga, birgalikda qarz oluvchilarning so‘nggi 12 oylik daromadlari yuzasidan ma’lumot, 30 yoshdan oshgan pedagoglar uchun mehnat daftarchasidan ko‘chirma ham talab qilinadi.
Ta’lim krediti stavkasi Markaziy bankning asosiy stavkasi miqdorida belgilanadi.
