O‘zbekistonda ilk bor qon plazmasidan inson albumini ishlab chiqarish boshlanadi
Viloyat hokimliklari tomonidan jami 2,5 milliard dollarlik farmatsevtika loyihalari bo‘yicha takliflar tayyorlangani ma’lum qilindi.
Prezident Shavkat Mirziyoyev raisligida farmatsevtika tarmog‘iga bag‘ishlangan videoselektor yig‘ilishida joriy yilda 1 milliard dollarlik yangi loyihalarni shakllantirib, ishga tushirish zarurligi qayd etildi.
Ma’lum qilinishicha, viloyat hokimliklari tomonidan jami 2,5 milliard dollarlik farmatsevtika loyihalari bo‘yicha takliflar tayyorlangan. Ushbu loyihalar hisobiga yiliga 1 milliard dollarlik import o‘rnini bosuvchi dorilarni ishlab chiqarish imkoniyati mavjud.
Xususan, Andijon viloyatida 203 million dollarlik 16 ta loyiha amalga oshirilishi reja qilinmoqda. Jumladan, 30 million dollarlik loyiha doirasida O‘zbekistonda ilk bor qon plazmasidan inson albumini ishlab chiqarish boshlanishi ko‘zda tutilgan.
Shuningdek, yig‘ilishda Navoiy, Qashqadaryo va Surxondaryo viloyatlari tomonidan taklif etilgan loyihalarning umumiy qiymati 100 million dollarga ham yetmagani aytildi.
