AQSh Erondan keyin Kubaga e’tibor qaratadi — Tramp
AQSh prezidenti Kuba masalasida davlat kotibi Marko Rubio faoliyatiga yuqori baho berdi va Vashington bu yo‘nalishni diqqat bilan kuzatayotganini ta’kidladi.
AQSh prezidenti Donald Tramp birinchi Eronga qarshi harbiy operatsiyani yakunlashni, shundan so‘ng esa Kuba masalasi bo‘yicha keyingi harakat yo‘nalishlarini ko‘rib chiqishni rejalashtirayotganini ma’lum qildi.
Oq uyda o‘tkazilgan tadbir chog‘ida davlat rahbari AQSh davlat kotibi va milliy xavfsizlik bo‘yicha maslahatchisi vazifasini bajaruvchi Marko Rubio faoliyatiga yuqori baho berdi. Trampning ta’kidlashicha, Amerika ma’muriyati Kubadagi vaziyatni ham diqqat bilan kuzatib bormoqda.
“Biz avvalo Eronga oid masalani yakunlashni istaymiz, shundan so‘ng keyingi qadamlar haqida o‘ylaymiz”, — dedi AQSh prezidenti.
Tramp, shuningdek, Lotin Amerikasidagi vaziyat haqida ham fikr bildirib, Venesuelada jarayonlar ijobiy tomonga o‘zgarayotganini ta’kidlagan. Uning so‘zlariga ko‘ra, mamlakatda saylangan prezident sifatida tilga olingan Delsi Rodriges bilan hamkorlik yo‘lga qo‘yilgan.
AQSh rahbari Venesueladan katta hajmda neft import qilinayotganini ham qayd etgan. Taʼkidlashicha, mazkur neft Houston va boshqa hududlardagi qayta ishlash korxonalariga yetkazib berilmoqda.
Avvalroq The Atlantic nashri manbalarga tayanib, AQSh rahbariyati Kuba bo‘yicha harbiy operatsiya ehtimolini ham muhokama qilayotgani haqida xabar bergan edi.
