Dubayda atigi 10 kunga yetadigan oziq-ovqat mahsulotlari qoldi
Yaqin Sharqdagi mojaro Dubay va boshqa shaharlarda oziq-ovqat yetkazib berishga jiddiy ta’sir ko‘rsatmoqda.
Yaqin Sharqdagi davom etayotgan mojaro global savdo oqimlariga sezilarli ta’sir ko‘rsatmoqda. Heute nashrining ma'lum qilishicha, logistika sohasidagi yetakchi kompaniya Kühne + Nagel bosh direktori Stefan Pol ma’lumotlariga ko‘ra, global havo yuk tashish bozori hozirda o‘z quvvatining taxminan 18 foizini yo‘qotgan.
Dubaydagi yangi oziq-ovqat mahsulotlari faqat atigi 10 kunga yetadi, deb ogohlantiradi Pol. Vaziyat ayniqsa yangi mahsulotlar – meva va sabzavotlar uchun xavfli bo‘lishi mumkin, chunki mintaqadagi ko‘plab davlatlar importga juda bog‘liq. Agar mojaro uzoq davom etsa, logistika menejerining so‘zlariga ko‘ra, ta’minot zanjirida jiddiy uzilishlar yuzaga kelishi mumkin.
Nazariy jihatdan Saudiya Arabistoni orqali transportni amalga oshirish mumkin bo‘lsa-da, mavjud imkoniyatlar bir konteyner kemasining yukini qoplash uchun yetarli emas. Bunday kema odatda 20 000 tagacha konteyner tashiy oladi – bu hajmni avtomobil transporti bilan qoplash deyarli imkonsiz.
Yevropada hozircha urush ta’siri nisbatan cheklangan bo‘lib, faqat energiya narxlari sezilarli darajada oshgani va ta’minot zanjirlarida ba’zi uzilishlar kuzatilgan. Dubay va boshqa yirik savdo markazlarida do‘konlar yopiq yoki minimal xodimlar bilan ishlamoqda, bu esa biznes va turizm sohalariga salbiy ta’sir ko‘rsatmoqda.
