Eron xavfsizlik sababli yangi oliy rahbar nomini e’lon qilishni kechiktirdi
AQSh va Isroil bayonotlari yangi rahbar ham ehtimoliy nishonga aylanishi mumkinligi haqidagi xavotirlarni kuchaytirmoqda.
Eron rasmiylari mamlakatning sobiq oliy rahbari Ali Xomanaiy vafotidan so‘ng yangi yetakchini tayinlash masalasini xavfsizlik sabablariga ko‘ra vaqtincha kechiktirdi. Bu haqda The New York Times Eron hukumatiga yaqin ikki manbaga tayanib ma’lum qilgan.
Manbalarga ko‘ra, yangi oliy rahbar nomzodining e’lon qilinishi AQSh va Isroil tomonidan bildirilgan bayonotlardan keyin ortga surilgan. Ayrim izohlarda yangi tayinlanadigan rahbar ham ehtimoliy nishonga aylanishi mumkinligi ta’kidlangan.
Hozircha sobiq oliy rahbarning o‘g‘li — Mojtaba Xomanaiy asosiy nomzodlardan biri sifatida ko‘rilmoqda. Biroq uning nomi ommaviy axborot vositalarida tilga olinishi bilan xavfsizlikka oid xavotirlar ham kuchaygani qayd etilmoqda.
AQShning prezidenti Donald Tramp esa bu borada keskin bayonot berib, Mojtaba Xomanaiy nomzodini “qabul qilib bo‘lmaydigan tanlov” deb baholagan.
Shuningdek, Isroil mudofaa vaziri Israel Katz ijtimoiy tarmoqlardagi chiqishida Eron tomonidan tayinlanadigan har qanday yangi rahbar ehtimoliy nishonga aylanishi mumkinligini ta’kidlagan.
