Eronga men aytgan rahbar tayinlanadi — Tramp
Qo‘shma Shtatlar prezidenti Eron Oliy rahnamosi sifatida Xomanaiyning o‘g‘li tayinlanishiga qarshi chiqdi.
AQSH prezidenti Donald Tramp Axios nashriga bergan intervyusida Eronda hokimiyat tepasiga marhum oliy rahnamo Ali Xomanaiyning o‘g‘li kelishiga qarshiligini bildirdi va yangi rahbarni tanlash jarayonida shaxsan ishtirok etishini ma’lum qildi.
Trampning so‘zlariga ko‘ra, Oyatulloh Xomanaiyning o‘g‘li Mujtabo Xomanaiy Vashington uchun ma’qul bo‘lmagan nomzod hisoblanadi. Prezident Erondagi avvalgi siyosatni davom ettiradigan har qanday vorisning tayinlanishiga AQSH qarshi ekanini ta’kidladi va agar unga ma’qul nomzod tayinlanmasa, Qo‘shma Shtatlar besh yil ichida yana urush boshlashga to‘g‘ri kelishini bildirdi.
Mujtabo Xomanaiy 28-fevral kuni otasi vafotidan so‘ng asosiy rahnamolik uchun nomzod bo‘lib qolgan. Yangi rahbarni Eron Ekspertlar assambleyasi saylashi kerak bo‘lib, 4-mart kuni assambleya a’zosi Mahmud Rajabi jarayon allaqachon boshlanganini ma’lum qilgan.
Hozirda mamlakatni uch kishidan iborat muvaqqat kengash boshqarmoqda: Mas’ud Pezeshkiyon, sud hokimiyati rahbari G‘ulom Husayn Muhsiniy-Ejeiy va Oyatulloh Orif.
Ekspertlar va nashrlar, jumladan The New York Times, Mujtabo Xomanaiyning tayinlanishi mamlakat ichida norozilik va shia ruhoniylari tomonidan qarshilikka sabab bo‘lishi mumkinligini ta’kidlamoqda.
Isroil esa Eronda avvalgi siyosatni davom ettiruvchi yangi rahbar “yo‘q qilish uchun nishon” bo‘lishi mumkinligini bildirgan.
