Isroil Bayrutni bombardimon qildi: Eronga qarshi urush ko‘lami kengaydi
Isroil “Hizbulloh”ni yo‘q qilish uchun Livanga hujum qilmoqda.
Juma kuni Isroil Bayrutning janubiy tumanlarini bombardimon qilgan va butun hududni evakuatsiya qilishni buyurgan. Bu haqda Reuters xabar bermoqda.
Qayd etilishicha, bu harakat Isroil va AQSH bir hafta oldin boshlagan Eronga qarshi urushni sezilarli darajada kengaytirishga olib keldi.
Isroil Bayrutdagi bombardimonni Eron bilan aloqador “Hizbulloh” shialar militsiyasini yo‘q qilish maqsadida kuchaytirgani aytilmoqda. “Hizbulloh” 1980-yillardan beri Livan siyosatida kuchli ta’sirga ega bo‘lib, ayni hafta oyatulloh Ali Xominaiyning o‘limiga javoban Isroilga qarshi o‘t ochgan.
Isroil armiyasi butun tun davomida Bayrutga 26 ta zarba berganini va Eron tomonidan qo‘llab-quvvatlanadigan “Hizbulloh” qo‘mondonlik markazlari va qurol saqlash omborlari nishonga olinganini ma’lum qildi.
“Biz ko‘chalarda uxlashga majbur bo‘ldik — ba’zilar mashinada, ba’zilari ko‘chada, ba’zilar plyajda,” — dedi 43 yoshli bayrutlik Jamal Seyfeddin. U Bayrutning janubiy tumanlaridan qochib, poytaxt markazidagi ko‘chalarda tungi soatlarni o‘tkazgan.
Isroil tarix davomida Livanga bir necha bor tahdid qilgan, eng so‘nggi marta 2024-yilda “Hizbulloh”ni zaiflashtirgan bombardimon kampaniyasini amalga oshirgan edi. Ammo juma kunidagi zarbalar Bayrutdagi urush tarixida oldingi tajribalar bilan solishtirganda misli ko‘rilmagan darajada kuchli bo‘lgani aytilmoqda.
Isroil aholini Bayrutning janubiy hududini tark etishga chaqirgan. Avvalgi kampaniyalarda faqat kichik hududlarda evakuatsiya talab qilingan edi. Bayrutni bombardimon qilish bilan bir vaqtda Isroil Tehrondagi infratuzilmani nishonga olish maqsadida Eronga qarshi yangi zarbalar berishni boshlagan.
Isroil hududida ham portlashlar eshitilib, Isroil mudofaa tizimi Erondan kelayotgan zarbalarni yo‘q qilishga harakat qilgan. Eronning Islom inqilobi qo‘riqchilari korpusi Tel-Aviv markazini nishonga olgan raketa va dron operatsiyasini amalga oshirganini ma’lum qilgan.
Shuningdek, tungi soatlarda Eron dronlari Qatar, Al-Udeyd AQSH aviabazasini ham nishonga olgan, bu Yaqin Sharqdagi eng yirik AQSH bazasi hisoblanadi. Qatarlik rasmiylar jabrlanuvchilar yo‘qligini bildirgan.
