Jizzaxda aliment to‘lamagan ota mashinasidan ayrildi
Maʼlumotlarga ko‘ra, uning alimentdan qarzi 20 million so‘mga yetgan.
Ayrim ota-onalar farzand taʼminoti masʼuliyatni unutib, avtomashina minib yurishdan ko‘ra farzandlarining taʼminotini taʼminlash muhimroq ekanligini anglab yetmaydilar.
Fuqarolik ishlari bo‘yicha sudning qaroriga ko‘ra, qarzdor A.A.dan undiruvchi S.Ch. foydasiga ikki nafar voyaga yetmagan farzandi taʼminoti uchun aliment undirish belgilangan. Mazkur ijro hujjati Majburiy ijro byurosi Zomin tumani bo‘limi ish yurituviga kelib tushgan.
Ijro harakatlari davomida A.A.ning alimentdan qarzi 20 million so‘mga yetganligi aniqlandi. Tegishli tashkilotlarga yuborilgan so‘rovnomalardan so‘ng, qarzdorga tegishli Matiz rusumli avtomashinasi borligi maʼlum bo‘ldi. Qarzdor ushbu mashinada yo‘lovchi tashish faoliyati bilan shug‘illanib, aliment qarzdorligini to‘lab borishini aytgan, biroq alimentni to‘lamagan.
Ijro harakatlari davomida qarzdorga tegishli Matiz rusumli mashina jarima maydonchasiga joylashtirildi.
Agar qarzdor aliment qarzini o‘z vaqtida to‘lamasa, mashina auksion savdosida sotiladi.
