Ko‘p xonadonli uylar qurilishida kompleks yondashuv joriy etiladi
Prezident qarori bilan 2026–2028 yillarda ayrim hududlarda maxsus huquqiy rejim tajriba tariqasida qo‘llaniladi.
O‘zbekistonda ko‘p xonadonli majmualarini barpo etishda kompleks qurilish mexanizmlarini joriy etish va jarayonlarda shaffoflikni ta’minlash bo‘yicha yangi tartiblar belgilandi. Bu haqda Prezidentning “Ko‘p kvartirali turar joy majmualarini qurishda kompleks qurilish mexanizmlarini joriy etish va shaffoflikni ta’minlash chora-tadbirlari to‘g‘risida”gi qarorida nazarda tutilgan.
Hujjatga ko‘ra, 2026 yil 1 martdan 2028 yil 1 martgacha ayrim yer uchastkalarida ko‘p kvartirali uylarni kompleks qurilish mexanizmlari asosida barpo etishni nazarda tutuvchi “Tartibga solish qumdoni” maxsus huquqiy rejimi tajriba tariqasida joriy etiladi.
Prezidentning avval qabul qilingan PF–29-son farmoniga muvofiq tashkil etilgan investitsiya kompaniyalari hududlarda kompleks qurilish loyihalarini amalga oshirish uchun mas’ul tashkilot sifatida faoliyat yuritadi.
Qarorda hududlarda yashil bog‘lar, ekoparklar va xiyobonlar barpo etish investitsiya kompaniyalari faoliyatining asosiy yo‘nalishlaridan biri etib belgilangan. Bunda mazkur maqsadlar uchun davlat mulki obyektlari va yer uchastkalarini sotishdan mahalliy byudjetga tushadigan mablag‘larning 10 foizi, shuningdek mahalliy byudjetlarning qo‘shimcha manbalarining kamida 5 foizi yo‘naltirilishi ko‘zda tutilgan.
Shuningdek, Toshkent shahrida yashil hududlarni kengaytirish hamda har bir tumanda bittadan ekobog‘ barpo etish bo‘yicha takliflar ishlab chiqilishi rejalashtirilgan.
Qarorga muvofiq, 2027 yil 1 yanvardan boshlab ko‘p kvartirali uylarning qurilish-montaj ishlarini boshlash uchun beriladigan ruxsatnoma “Shaffof qurilish” tizimi orqali “Uy-joy” yagona raqamli urbanizatsiya platformasida idoralararo integratsiya asosida avtomatik tarzda shakllantiriladi.
