Oliy ta’lim vazirligi xodimi 100 ming dollar bilan qo‘lga tushdi
Xodim nodavlat oliy ta’lim muassasasining filiali ochilishiga litsenziya berish uchun pora talab qilgan.
O‘zbekiston Oliy ta’lim, fan va innovatsiyalar vazirligining Ta’lim tashkilotlarini litsenziyalash bo‘limi yetakchi mutaxassisi Qarshi shahrida faoliyat yurituvchi nodavlat oliy ta’lim muassasasining Surxondaryodagi filialini ochish uchun litsenziya berish jarayonida 100 ming AQSH dollari talab qilganligi uchun ushlandi. Bu haqda Zamon.uzga DXX ma’lum qildi.
Hodisa Davlat xavfsizlik xizmati DXX xodimlari tomonidan Toshkentda o‘tkazilgan tezkor tadbirda aniqlandi. Xodim so‘ralgan pul mablag‘ini olgan vaqtida ashyoviy dalillar bilan qo‘lga olingan.
Davlat xavfsizlik xizmati Tergov boshqarmasi tomonidan mazkur shaxsga nisbatan O‘zbekiston Jinoyat Kodeksining 168-moddasi 4-qismi “a” bandi bo‘yicha jinoyat ishi qo‘zg‘atildi va “qamoq” ehtiyot chorasi qo‘llandi. Hozirda tergov harakatlari olib borilmoqda.
