Ozarbayjon Erondagi diplomatlarini chaqirib olishga qaror qildi
Qaror Naxchivondagi dron hujumidan so‘ng qabul qilingan, ammo Eron tomoni voqea ortida uchinchi kuchlar bo‘lishi mumkinligini bildirgan.
Ozarbayjon hukumati Erondagi diplomatik xodimlarini chaqirib olishga qaror qildi. Bu haqda mamlakat tashqi ishlar vaziri Jeyhun Bayramov ma’lum qildi.
Uning ta’kidlashicha, mazkur qaror Ilhom Aliyev tomonidan qabul qilingan. Bayramovning so‘zlariga ko‘ra, Boku Erondagi diplomatik missiyasida faoliyat yuritayotgan barcha xodimlarni mamlakatga qaytarishni rejalashtirmoqda.
Mazkur qaror 5-mart kuni Naxchivon avtonom Respublikasi hududiga uchuvchisiz uchish apparatlari hujumi yuz bergani haqidagi xabarlar fonida qabul qilingan. Ozarbayjon tomonining ma’lumotiga ko‘ra, ikki dron aeroport binosi hamda maktab yaqinidagi hududga zarba bergan, natijada to‘rt nafar fuqaro jarohat olgan.
Boku mazkur hujumda Eronni ayblab, hududga jami to‘rtta dron yuborilganini bildirgan.
Tehron esa ushbu ayblovlarni qat’iyan rad etmoqda. Eron tashqi ishlar vaziri Abbos Aroqchi Bayramov bilan o‘tkazgan suhbatida Eron hujumga aloqador emasligini ta’kidlab, voqea ortida ikki davlat o‘rtasidagi munosabatlarni keskinlashtirishga urinayotgan kuchlar turishi mumkinligini bildirgan.
