O‘zbekistonda “Daromadli ayol” dasturi boshlanadi
Mazkur dastur orqali lider tadbirkorlar yordamida kasanachilik, hunarmandchilik, parrandachilik, asalarichilik va tomorqachilik yo‘nalishlarida 50 ming ayol bandligi ta’minlanadi.
166 ming xotin-qiz zamonaviy kasb va tadbirkorlik sohalarida, yana 100 ming nafari axborot texnologiyalari yo‘nalishida o‘qitilishi rejalashtirilgan. Bu haqda Ko‘ksaroy qarorgohida Xalqaro xotin-qizlar kuni munosabati bilan bo‘lib o‘tgan bayram tadbirida e’lon qilindi.
Ma’lum qilinishicha, xotin-qizlar o‘z uylarida tadbirkorlik faoliyatini yo‘lga qo‘yishi uchun “Daromadli ayol” dasturi orqali lider tadbirkorlar yordamida kasanachilik, hunarmandchilik, parrandachilik, asalarichilik va tomorqachilik yo‘nalishlarida 50 ming ayol bandligi ta’minlanadi.
Bundan tashqari, “Hamroh” dasturi doirasida xotin-qizlarning 3 mingta loyihasiga jami 1 trillion so‘m ajratilishi kutilmoqda.
Shuningdek, joriy yilda 1,5 million ayolni daromadli qilish, shundan 400 ming nafarini biznesga jalb etish maqsad qilingani, bu maqsadlar uchun 25 trillion so‘mdan ortiq resurs ajratilishi ma’lum qilindi.
