O‘zbekiston–Vengriya uchinchi rektorlar forumi: Ikki tomonlama hamkorlik shartnomalari imzolandi

Samarqanddagi “Ipak Yo‘li” Turizm va Madaniy Meros Xalqaro Universitetida “Raqamli davrda oliy ta’lim: sun’iy intellekt, in modellar va global raqobatbardosh universitetlar” mavzusida O‘zbekiston–Vengriya uchinchi rektorlar forumi bo‘lib o‘tdi.

 

Forumda O‘zbekiston Respublikasi Oliy ta’lim, fan va innovatsiyalar vaziri Qo‘ng‘irotboy Sharipov, Vengriya Rektorlar konferensiyasi prezidenti Bela Merkeli, Vengriyaning O‘zbekistondagi Favqulodda va Muxtor elchisi Yojef Roja, Obuda universiteti rektori Levente Kovach, shuningdek, ikki mamlakatning yetakchi oliy ta’lim tashkilotlari rahbarlari va soha vakillari ishtirok etdi.

 

Ma’lumotlarga ko‘ra, O‘zbekiston va Vengriya o‘rtasidagi ta’lim va ilm-fan sohasidagi hamkorlik 2017-yilda imzolangan hukumatlararo bitim asosida rivojlanmoqda. Hozirgi kunda O‘zbekistonning 50 dan ortiq oliy ta’lim muassasalari Vengriyaning 30 dan ziyod universitet va ilmiy-ta’lim tashkilotlari bilan 100 ga yaqin hamkorlik shartnomalari asosida faoliyat yuritmoqda. Shuningdek, 17 ta qo‘shma startap loyihalari amalga oshirilmoqda.

 

Forum doirasida ta’lim tizimiga sun’iy intellekt texnologiyalarini joriy etish, innovatsion ta’lim modellari yaratish, universitetlararo ilmiy tadqiqotlar, qo‘shma laboratoriyalar tashkil etish va “universitet–sanoat” hamkorligini kuchaytirish masalalari muhokama qilingan.

 

Tadbirda yalpi majlis va bir nechta parallel sessiyalar o‘tkazilib, ikki mamlakat rektorlari va ekspertlari zamonaviy oliy ta’limni rivojlantirish, innovatsiyalar va startaplarni qo‘llab-quvvatlash hamda yoshlarning ilmiy faolligini oshirish bo‘yicha taqdimotlar qilgan.

 

Forum dasturining yakuniy qismida O‘zbekiston va Vengriya oliy ta’lim muassasalari o‘rtasida erishilgan kelishuvlar asosida ikki tomonlama hamkorlik shartnomalarini almashish marosimi bo‘lib o‘tdi. Ushbu kelishuvlar qishloq xo‘jaligi, muhandislik, axborot texnologiyalari, sun’iy intellekt, energetika, tibbiyot va pedagogika sohalarida qo‘shma ta’lim va ilmiy tadqiqot loyihalarini amalga oshirishga xizmat qilishi aytilmoqda.