Suv tanqisligining oldini olishga 600 milliard so‘m yo‘naltiriladi
Mazkur mablag‘lar hisobidan suv yo‘qotilishi yuqori bo‘lgan 389 kilometr uzunlikdagi kanallar rekonstruksiya qilinib, betonlashtiriladi.
O‘zbekistonda suv resurslaridan samarali foydalanish va suv tanqisligining oldini olish maqsadida kanal va sug‘orish tarmoqlarini rekonstruksiya qilish ishlari amalga oshiriladi. Bu borada Prezident qarori qabul qilindi.
Hujjatga muvofiq, suv infratuzilmasini yangilash ishlari uchun davlat byudjeti hisobidan mablag‘ ajratiladi. Jumladan, kanallar va sug‘orish tarmoqlarini betonlashtirish ishlariga 480 mlrd so‘m, suv tanqisligining oldini olishga qaratilgan chora-tadbirlar uchun 120 mlrd so‘m yo‘naltiriladi.
Mazkur mablag‘lar hisobidan suv yo‘qotilishi yuqori bo‘lgan 389 kilometr uzunlikdagi kanallar rekonstruksiya qilinib, betonlashtiriladi. Loyihani amalga oshirish natijasida yiliga o‘rtacha 206 mln kub metr suv hamda 26 mln kilovatt-soat elektr energiyasini tejash imkoniyati yaratilishi kutilmoqda.
Shuningdek, amalga oshiriladigan ishlar orqali 159 ming gektar sug‘oriladigan yerlarning suv ta’minotini yaxshilash rejalashtirilgan. Mutasaddilarga ko‘ra, bu choralar qishloq xo‘jaligida suvdan samarali foydalanishni ta’minlashga xizmat qiladi.
