Tehron markazidagi Xomanaiyning maxfiy bunkeri vayron qilindi — IDF
Operatsiyada 50 ga yaqin harbiy samolyot ishtirok etgan.
Isroil harbiy-havo kuchlari Eron poytaxti Tehron markazida joylashgan yer osti harbiy qo‘mondonlik inshootiga zarba berdi. Bu haqda Israel Defense Forces (IDF) matbuot xizmati ma’lum qildi.
IDF bayonotiga ko‘ra, operatsiyada qariyb 50 ta harbiy samolyot ishtirok etib, nishonga yuzdan ortiq o‘q-dorilar tashlangan. Hujum natijasida hukumat binolari majmuasi ostida joylashgan yer osti qo‘mondonlik bunkeri vayron qilingan.
Isroil harbiy razvedkasi ma’lumotlariga ko‘ra, ushbu bunker Tehron markazidagi bir nechta ko‘chalar ostida joylashgan bo‘lib, yer yuzasiga bir nechta chiqish yo‘llariga ega bo'lgan. Inshoot Eron rahbariyati uchun muhim harbiy qo‘mondonlik markazlaridan biri sifatida foydalanilgan.
IDF ta’kidlashicha, bunker maxsus ravishda Eron oliy yetakchisi Ali Xomanaiy uchun qurilgan. Biroq Isroil tomoni ma’lumotiga ko‘ra, Oyatulloh mazkur boshpanadan foydalanishga ulgurmasdan oldin halok bo‘lgan.
Isroil armiyasi ushbu zarba Eronning harbiy boshqaruv va nazorat tizimiga jiddiy zarar yetkazganini qayd etdi.
