Tramp Eronning “so‘zsiz taslim bo‘lishini” talab qildi
AQSh prezidenti Eron taslim bo‘lgach, mamlakatni tiklashda AQSh va ittifoqchilari yordam berishini aytdi.
AQSh prezidenti Donald Tramp Qo‘shma Shtatlar Eron bilan faqat uning to‘liq va shartsiz taslim bo‘lishi sharti bilan kelishuv tuzishi mumkinligini ma’lum qildi. Bu haqda u Truth Social ijtimoiy tarmog‘idagi sahifasida yozgan.
Trampning ta’kidlashicha, AQSh uchun Eron bilan shartsiz taslim bo‘lishdan boshqa hech qanday kelishuv varianti mavjud emas.
Uning so‘zlariga ko‘ra, Eron taslim bo‘lgach va mamlakatda “buyuk hamda maqbul rahbar yoki rahbarlar” saylangach, AQSh hamda uning ittifoqchilari Eronni og‘ir vaziyatdan chiqarishga yordam beradi.
“Shundan so‘ng biz va bizning jasur ittifoqchilarimiz Eronni halokat yoqasidan qaytarish, uni iqtisodiy jihatdan yanada rivojlantirish uchun tinimsiz ishlaymiz. Eronning buyuk kelajagi bor”, — deya yozgan AQSh prezidenti.
Eslatib o‘tamiz, 28-fevral kuni AQSh va Isroil tomonidan Eronga qarshi harbiy operatsiya boshlangan edi. Avvalroq Tramp Vashingtonning Eron bilan yadroviy kelishuv bo‘yicha muzokaralarda “sabri tugaganini” ham bildirgan.
