Yevrokomissiya yangi migratsiya inqirozidan xavotirda — Die Welt
Turkiya 90 ming qochqin uchun chodir shaharchasi qurishga tayyorgarlik ko‘rmoqda.
Yevropa Komissiyasi AQSh-Isroil va Eron bilan bog‘liq mojarolar tufayli keng ko‘lamli migratsiya harakati bo‘lishi mumkin deb hisoblamoqda. Bu haqda manbalarga tayanib Die Welt yozmoqda.
Qayd etilishicha, Yaqin Sharqdagi mojaro cho‘zilib ketsa, Eron va qo‘shni davlatlarda gumanitar inqiroz yuzaga kelishi va 2015-yildagi kabi migratsiya harakatlari boshlanishi mumkinligi bildirilgan.
Ma’lumotlarga ko‘ra, hozirning o‘zida mamlakat ichida, qishloq joylarga va dengiz sohillariga odamlarning ko‘chishi kuzatilmoqda.
Bryusseldagi muhokamalarda, ayniqsa, Eronda istiqomat qiluvchi 2,5 millionga yaqin afg‘onlar bilan bog‘liq vaziyat xavotir uyg‘otayotgani ta’kidlangan. Agar vaziyat yanada beqarorlashsa, ular mamlakatni tark etib, qo‘shni davlatlarga, birinchi navbatda, Turkiyaga yo‘l olishlari mumkin.
Shuningdek, Turkiya ichki ishlar vaziri Mustafo Chiftchi chorshanba kuni uchta Turkiya-Eron chegara punktida noodatiy harakatlar kuzatilmaganini aytdi. Shunga qaramay, hukumat bufer zonasi va 90 ming nafargacha qochqin uchun chodir shaharchasini qurishga tayyorgarlik ko‘rmoqda.
Yevropa Ittifoqining Boshpana masalalari bo‘yicha agentligi hisobotiga ko‘ra, 90 million aholiga ega Eronda hatto qisman beqarorlik ham katta migratsiya oqimini keltirib chiqarishi mumkin. Agar aholining kamida 10 dan 1 qismi mamlakatni tark etishga majbur bo‘lsa, oqibat ko‘lami so‘nggi o‘n yilliklardagi eng yirik migratsiya inqirozlari bilan taqqoslanishi mumkin.
