Andijonda yigitning suratlarini tarqatmaslik evaziga pul talab qilgan ayollar qo‘lga olindi
Ular TikTok orqali tanishgan shaxsning fotosuratlarini o'chirish evaziga 20 000 AQSh dollari talab qilgan.
Andijon viloyati Ichki ishlar boshqarmasi tezkor-qidiruv xizmati va Davlat xavfsizlik xizmatining Andijon viloyati bo‘yicha boshqarmasi xodimlari tomonidan o‘tkazilgan tezkor tadbirda ikki nafar ayolning jinoiy harakatlariga chek qo‘yildi. Aniqlanishicha, 2001-yilda tug'ilgan ayol o'ziga avvaldan tanish bo'lgan, Toshkent shahrida yashovchi 1999-yilda tug'ilgan ayol bilan oldindan jinoiy til biriktirgan.
Ulardan biri TikTok ijtimoiy tarmog'i orqali Andijon tumanida yashovchi 2002-yilda tug'ilgan erkak bilan tanishib, ishqiy munosabat o'rnatgan. Shundan so'ng jabrlanuvchining shaxsiga oid fotosuratlar ustiga turli uyatli va haqoratli so'zlar yozib, ushbu materiallarni o'chirib tashlash evaziga jabrlanuvchidan jami 20 000 AQSh dollari miqdorida pul talab qilishgan.
Tezkor tadbir davomida gumonlanuvchilar kelishilgan mablag‘ning bir qismini – 7 000 dollarni bank plastik kartasiga o‘tkazayotgan vaqtida ashyoviy dalillar bilan qo‘lga olingan.
Mazkur holat bo‘yicha O‘zbekiston Respublikasi Jinoyat kodeksining 165-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
