BAA Eron aktivlarini muzlatib qo‘yishi mumkinligi haqida ogohlantirdi

BAA rasmiylari raketa va dron hujumlariga javoban Eronning mamlakat hududidagi aktivlarini muzlatib qo‘yishi mumkinligi haqida ogohlantirdi. Bu haqda The Wall Street Journal nashri xabardor manbalarga tayanib xabar berdi.

 

Ma’lumotlarga ko‘ra, Amirliklar rasmiylari Tehronni maxfiy tarzda ehtimoliy moliyaviy choralar haqida ogohlantirgan. Ular orasida qobiq kompaniyalar hisoblarini muzlatish hamda valyuta ayirboshlash shoxobchalarini keng ko‘lamli tekshirish kabi choralar muhokama qilinmoqda.

 

Potensial sanksiyalarning asosiy nishonlaridan biri Islom inqilobi qo‘riqchilari korpusi (IRGC) bilan bog‘liq moliyaviy tuzilmalar bo‘lishi mumkin. Bunday choralar Eronning harbiy dasturlarini moliyalashtirish bilan bog‘liq kanallarga jiddiy zarba berishi mumkin.

 

Mutaxassislar ta’kidlashicha, ushbu cheklovlar amalga oshirilsa, Eronning xorijiy valyuta va global savdo tizimlariga kirish imkoniyatlari keskin cheklanishi ehtimoli mavjud. Chunki BAA uzoq yillar davomida G‘arb sanksiyalarini chetlab o‘tishda muhim moliyaviy markaz sifatida xizmat qilib kelgan.

 

Xususan, Tehron global bozorlarda neft sotishdan tushgan mablag‘larni Amirliklar infratuzilmasi orqali taqsimlab kelgani, shuningdek mahalliy valyuta ayirboshlash shoxobchalari orqali rasmiy bank tizimlaridan tashqarida moliyaviy operatsiyalar amalga oshirgani qayd etilgan.