Eronga qarshi “juda kuchli zarba” berilishi mumkin — Tramp
AQSh prezidenti Eronni “mag‘lub davlat” deb atab, bosim va zarbalar siyosati davom etishini ta’kidladi.
AQSh prezidenti Donald Tramp Eronga qarshi “juda kuchli zarba” berilishi mumkinligini ma’lum qildi. U bu haqda Truth Social ijtimoiy tarmog‘idagi sahifasida yozgan.
Amerika yetakchisining ta’kidlashicha, Eronning “yomon xatti-harakatlari” tufayli hozirgacha hujum uchun ko‘rib chiqilmagan ayrim hududlar va odamlar guruhlariga nisbatan ham keskin choralar ko‘rilishi ehtimoli muhokama qilinmoqda. Uning so‘zlariga ko‘ra, bunday harakatlar “to‘liq vayronagarchilik va muqarrar qurbonlarga” olib kelishi mumkin.
Donald Tramp Eron prezidenti Mas’ud Pezeshkianning qo‘shni davlatlardan uzr so‘rab, ularga nisbatan boshqa hujumlar bo‘lmasligiga va’da bergan bayonotiga ham izoh berdi.
AQSh prezidenti bu holatni Eronning Yaqin Sharqdagi qo‘shni davlatlari oldida “taslim bo‘lishi” sifatida baholagan.
Tramp, shuningdek, Eronni “mag‘lub” deb atab, uning pozitsiyasi “taslim bo‘lmaguncha yoki butunlay qulamaguncha uzoq yillar davomida shunday bo‘lib qolishi mumkinligini” ta’kidlagan.
