Namanganda farg‘onalik soliqchi pora olayotganda qo‘lga tushdi
U Farg‘ona tumanidagi yer maydonini namanganlik tadbirkorga 95 dollar evaziga ajratib bermoqchi bo‘lgan.
Namangan viloyatining Yangi Namangan tumanida soliq inspeksiyasi xodimi tadbirkordan 20 ming dollar pora olayotganda qo‘lga tushdi. Bu haqda DXX Zamon.uz’ga xabar berdi.
Ma’lum qilinishicha, Farg‘ona viloyati Farg‘ona tumani soliq inspeksiyasining bosh inspektori mazkur tuman hokimligi zaxirasida bo‘lgan va qishloq xo‘jaligi uchun mo‘ljallangan 10 gektar yer maydonini namanganlik tadbirkorga kelgusida sayyohlik maskani tashkil etishi uchun ajratib berish evaziga 95 ming dollar hamda yer maydoni toifasini o‘zgartirib berish evaziga 6 ming dollar (jami 101 ming dollar) talab qilgan.
Namangan viloyatining Yangi Namangan tumanida o‘tkazilgan tezkor tadbirda bosh inspektor oldindan 20 ming dollar olgan vaqtida ashyoviy dalillar bilan ushlangan.
Hozirda unga nisbatan Namangan viloyati prokuraturasi tomonidan Jinoyat Kodeksining 168-moddasi 4-qismi “a” bandi va 28,211-moddasi 2-qismi “a” bandi bilan jinoyat ishi qo‘zg‘atilib, “qamoq” ehtiyot chorasi qo‘llanildi. Tergov harakatlari olib borilmoqda.
