Namanganda jazmani bilan til biriktirib erini o‘ldirmoqchi bo‘lgan ayol qo‘lga olindi

Namangan viloyati Davlatobod tumanida ayol va uning jazmani tomonidan qotil yollab, odam o‘ldirish bilan bog‘liq jinoyatning oldi olindi. Bu haqda Ichki ishlar vazirligi axborot xizmati ma’lum qildi.

 

Ma’lum qilinishicha, 4-mart kuni Davlatobod tumanida yashovchi ayol o‘zining jazmani bilan oldindan til biriktirib, shar’iy nikoh asosida birga yashab kelgan turmush o‘rtog‘ini 6 ming AQSH dollari evaziga o‘ldirtirishni rejalashtirgani aniqlangan.

 

Shundan so‘ng Namangan viloyati Ichki ishlar boshqarmasi, Davlat xavfsizlik xizmati hamda prokuratura xodimlari hamkorligida tezkor tadbir o‘tkazilgan. Ma’lum bo‘lishicha, buyurtmachilar Telegram orqali shartli qotil bilan bog‘lanib, erkakni Cobalt avtomobilida yolg‘iz yurgan paytda Andijon—Namangan yo‘lida joylashgan ovloq hududda o‘ldirish, so‘ng avtomobilni yoqib yuborish bo‘yicha ko‘rsatmalar bergan.

 

Tezkor tadbir davomida jabrlanuvchining o‘ldirilgani sahnalashtirilib, ushbu jarayon videoga olinib buyurtmachilarga ko‘rsatilgan. Shundan so‘ng ular kelishilgan pul mablag‘ining 5,5 ming AQSH dollarini topshirayotgan vaqtida tezkor xodimlar tomonidan ashyoviy dalillar bilan qo‘lga olingan.

 

Mazkur holat yuzasidan Namangan viloyati prokuraturasi tomonidan Jinoyat kodeksining 25-moddasi orqali 97-moddasi ikkinchi qismi bilan jinoyat ishi qo‘zg‘atilgan. Gumonlanuvchilar Jinoyat-protsessual kodeksining 221-moddasi tartibida ushlangan bo‘lib, hozirda dastlabki tergov harakatlari olib borilmoqda.