Qo‘shma Shtatlar Rossiya neftiga qo‘yilgan ayrim sanksiyalarni yumshatishi mumkin — AQSh moliya vaziri
Vashington Eron atrofidagi keskinlik fonida jahon neft bozoridagi vaziyatni barqarorlashtirish choralarini ko‘rib chiqmoqda.
Isroil va AQShning Eron bilan urushi tufayli jahon neft bozorida yuzaga kelgan keskin vaziyat sabab, Vashington Rossiya neftiga nisbatan ayrim sanksiyalarni yumshatishi mumkin. Bu haqda AQSh moliya vaziri Skott Bessent Fox News telekanaliga bergan intervyusida ma’lum qildi.
Vazirning aytishicha, Isroil va AQShning Eron bilan mojarosi fonida jahon neft bozorida keskin vaziyat yuzaga kelgan. Shu sababli bozorga qo‘shimcha neft chiqarish orqali taklifni oshirish masalasi muhokama qilinmoqda.
“Dengizda Rossiyaning yuzlab million barrel xom nefti ortilgan tankerlar turibdi. Agar ularni sanksiyalardan ozod qilsak, jahon bozoriga qo‘shimcha taklifni oshirishimiz mumkin. Biz bunday imkoniyatni ko‘rib chiqyapmiz”, — dedi Bessent.
Shuningdek, 6-mart kuni AQSh Hindistondagi neftni qayta ishlash zavodlarini Rossiya neftini sotib olishga qo‘yilgan taqiqdan 30 kun muddatga ozod qildi. Bu qaror allaqachon tankerga yuklangan neftga nisbatan amal qiladi.
Bessentning aytishicha, Eron bilan urush fonida neft bozoridagi vaziyatni yengillashtirishga qaratilgan choralar haqida AQSh hukumati bundan keyin ham ma’lumot berib boradi.
