Rossiya Eronga AQSh kuchlari haqida razvedka ma’lumotlarini taqdim qilmoqda, Xitoy esa moliyaviy yordam bermoqchi
Qo'shma Shtatlar mudofaa vaziri AQSh-Isroil va Eron urushida Rossiya bilan Xitoy muhim rol o‘ynamayotganini bildirgan.
Rossiya Eronga AQSh qo‘shinlari, kemalari va samolyotlarining joylashuvi, harakatlari haqida razvedka ma’lumotlarini taqdim etmoqda. Bu haqda AQSh razvedkasiga aloqador manbalarga tayanib CNN xabar berdi.
Qayd qilinishicha, Rossiyaning ushbu harakatlari Moskvani urushga aralashishga urinayotgani haqidagi birinchi belgi sifatida baholanmoqda.
Manbalardan biri Rossiya Eron bilan bo‘lishgan razvedka ma’lumotlarining katta qismi Moskvadagi ilg‘or sun’iy yo‘ldosh tizimlaridan olingan tasvirlar bo‘lganini aytmoqda. Bunday yordamlar evaziga Rossiya Erondan nimani olishi esa noma’lum.
CNN Kreml va Vashingtondagi Rossiya elchixonasidan mazkur holat bo'yicha izoh so‘ragan.
Shuningdek, qaysidir Eron hujumi aynan Rossiya taqdim etgan razvedka ma’lumotlariga asoslangani hozircha isbotlanmagan. Biroq so‘nggi kunlarda bir nechta Eron dronlari AQSh qo‘shinlari joylashgan hududlarga hujum qilgan. Jumladan yakshanba kuni Eron droni AQSh askarlari vaqtincha joylashgan Kuvaytdagi binoga zarba berib, olti amerikalik harbiyni halok qilgan.
Manbalarga ko‘ra, AQShda Xitoyning Eron uchun moliyaviy yordam, ehtiyot qismlar va raketa komponentlarini taqdim etishga tayyorlanayotgani haqidagi razvedka ma’lumotlari mavjud.
Shu bilan birga, Pekin hozirgacha urushda to‘g‘ridan-to‘g‘ri ishtirok etmayapti. Xitoy Tehronni Ho‘rmuz bo‘g‘ozidagi kemalarning xavfsiz harakatni ta’minlashga undayotgani aytilmoqda.
Manbalardan biri Eron nefti Xitoy uchun juda muhimligiga ishora qilib: “Xitoy qo‘llab-quvvatlashda ehtiyotkorroq. Ular urushning tugashini xohlaydi, chunki mojaro ularning energiya ta’minotiga tahdid soladi”, — dedi.
AQSh razvedka xizmati izoh berishni rad etdi. CNN Xitoy elchixonasidan ham Eronni qo‘llash bo‘yicha tayyorgarlik haqida izoh so‘ragan.
AQSh mudofaa vaziri Pit Hegset esa chorshanba kuni jurnalistlarga Rossiya bilan Xitoy AQSh-Isroil va Eron urushida muhim rol o‘ynamayotganini bildirgan.
Ma’lumot o‘rnida, so‘nggi uch yil davomida Rossiya va Eron raketa, dron texnologiyasi sohasida hamkorlik qilmoqda. Eron Rossiyaga Shahed dronlari va qisqa masofali ballistik raketalarni yetkazib, ularni Ukrainaga qarshi ishlatishda yordam bergan, Rossiyada Eron dizaynidagi dronlarni ishlab chiqaradigan katta zavod tashkil qilishda ham yordam ko‘rsatgan. Eron esa o‘z navbatida Rossiyadan yadro dasturini rivojlantirishda yordam so‘ragan.
CENTCOM qo‘mondoni admiral Brad Kuper hozirgi vaqtda AQShning Eronga qarshi operatsiyasi 50,000 dan ortiq qo‘shin, 200 dan ortiq jangovar samolyot va ikki aviatsiya kemasini o‘z ichiga olishini ma’lum qildi.
Eronga qarshi harbiy harakatlar qancha davom etishi haqida aniq ma’lumotlar yo‘q.
