Rossiya Ukrainaga dron va raketalar bilan hujum qildi: Xarkivda kamida yetti kishi halok bo‘ldi
Rossiya Ukraina bo‘ylab energetika sektori va temiryo‘l infratuzilmasini nishonga olgan.
Shanba kuni kechasi Rossiya Ukraina hududiga dronlar va raketalar bilan ommaviy hujum uyushtirdi. Bu haqda Ukraina rasmiylariga tayanib, Reuters xabar bermoqda.
Ma’lum qilinishicha, hujumlar oqibatida infratuzilma zarar ko‘rgan hamda Ukrainaning shimoliy-sharqidagi Xarkiv shahrida kamida yetti kishi, jumladan ikki nafar bola halok bo‘lgan.
Ukraina prezidenti Volodimir Zelenskiy Rossiya mamlakat bo‘ylab energetika sektori va temiryo‘l infratuzilmasini nishonga olib, 480 ta dron va 29 ta raketa uchirganini aytdi.
“Hayotga qarshi qaratilgan bunday vahshiyona zarbalarga hamkor davlatlar tomonidan javob bo‘lishi kerak”, — dedi Zelenskiy Telegram-kanalida.
Zelenskiyning ta’kidlashicha, Rossiya Ukrainaning turar joylari va muhim infratuzilmasini yo‘q qilishga qaratilgan urinishlaridan hamon voz kechmagan. Shu bois u hamkor davlatlarni havo mudofaasi tizimlari va qurol-yarog‘ yetkazib berishni davom ettirishga chaqirdi.
Ukraina havo kuchlari ma’lumotiga ko‘ra, havo mudofaasi bo‘linmalari 453 ta dron va 19 ta raketani urib tushirgan. Shunga qaramay, Rossiya tomonidan uchirilgan 9 ta raketa va 26 ta hujumchi dron 22 ta obyektga zarba bergan.
