Toshkentda tuman hokimligi mansabdorlari pora bilan ushlandi
Mansabdorlar fuqaroning turar joy xonadonini noturar joy sifatida rasmiylashtirib berish uchun pul talab qilgan.
Yashnobod tumani hokimining tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha mahalla fuqarolar yig‘inlaridan biridagi yordamchisi pora sifatida 5 ming dollarni olgan vaqtida ashyoviy dalillar bilan ushlandi. Bu haqda Zamon.uz ga DXX ma’lum qildi.
Ma’lum qilinishicha, hokim yordamchisi tadbirkorlik bilan shug‘ullanmoqchi bo‘lgan fuqaroning ko‘p qavatli uyning 1-qavatidagi turar joy xonadonini noturar joy toifasiga o‘tkazishga yuqori lavozimda ishlovchi tanishlari orqali ruxsat olib berish va tegishli hujjatlarini rasmiylashtirishda ko‘maklashish evaziga 5 ming dollar talab qilgan.
Tergovga qadar tekshiruv davomida, hokim yordamchisi fuqaroning ishini hal qilish uchun Yashnobod tuman hokimiyati bo‘linma rahbariga ham pul berishi aniqlanib, ikkinchi mansabdor ham 600 dollar pora olayotganda qo‘lga olingan.
Hozirda qonunbuzarlarga nisbatan Jinoyat Kodeksining 168 va 28,211-moddalari bilan jinoyat ishi qo‘zg‘atilib, "qamoq" ehtiyot chorasi qo‘llanildi. Tergov harakatlari olib borilmoqda.
