Toshkentda yaqin uch kun havo sifati yomonlashishi mumkin
Tonggi soatlarda tuman, yuqori namlik hamda deyarli shamolsiz ob-havo kuzatilayotgani havo almashinuvining sekinlashishiga sabab bo‘lmoqda.
Bugundan boshlab mamlakat hududiga sovuq antisiklon kirib kelishi sababli atmosfera havosi sifati vaqtincha yomonlashishi kutilmoqda. Bu haqda “O‘zgidromet” xabar berdi.
Mutaxassislar havo aylanishining sustlashuvi va harorat inversiyasi shakllanishi ehtimoli tufayli ifloslantiruvchi moddalar atmosferaning yerga yaqin qatlamida to‘planib borishini bildirgan.
“Ayni paytda hududda harorat inversiyasiga olib keluvchi meteorologik sharoitlar kuzatilmoqda. Bu kechasi +5…+7°C, kunduzi esa +16…+18°C atrofida bo‘layotgan keskin harorat farqi bilan izohlanmoqda. Toshkent shahri nam va nisbatan salqin havo massasi ta’sirida qolmoqda”, deyiladi agentlik xabarida.
Tahlillarga ko‘ra, soatlarda tuman, yuqori namlik hamda deyarli shamolsiz ob-havo kuzatilayotgani havo almashinuvining sekinlashishiga sabab bo‘lmoqda. Natijada chiqindilar shahar hududida saqlanib qolishi mumkin.
Mutaxassislarning ta’kidlashicha, bunday sharoitda shaharga xos odatiy ifloslantiruvchi moddalar — avtotransport chiqindilari, isitish tizimlari, yoqilg‘i yoqish jarayoni hamda sanoat chiqindilari atmosferada to‘planadi. Ifloslantiruvchi moddalar tarqalishining sustligi sababli havoda chang va mayda dispersli zarrachalar konsentratsiyasi ortishi ehtimoli bor.
Prognozlar mazkur vaziyat yaqin uch kun davomida saqlanib turishi mumkinligini ko‘rsatmoqda. 10-martga kelib sovuq antisiklon mamlakat hududini to‘liq qamrab oladi. Shundan so‘ng havo harorati barqarorlashishi, shamol tezligining oshishi hamda yog‘ingarchilik kuzatilishi natijasida atmosfera havosidagi ifloslantiruvchi moddalar tarqalishi kutilmoqda.
