Transport vazirligi Yaqin Sharqda sayyohlarni yordamsiz qoldirgan turoperatorlarni tanqid qildi
Vazirlik ma’lumotiga ko‘ra, evakuatsiya qilinayotgan fuqarolarning qariyb 95 foizi hududga paketli turlar orqali safar qilgan.
Transport vazirligi Yaqin Sharqda sayyohlik safarida bo‘lgan o‘zbekistonliklarni qiyin vaziyatda yordamsiz qoldirgan turoperator va agentliklar faoliyatini tanqid qildi.
Vazirlik ma’lumotiga ko‘ra, Yaqin Sharqdan fuqarolarni evakuatsiya qilish jarayonida ularning qariyb 95 foizi paketli turlar orqali ushbu hududga safar qilgani aniqlangan.
Biroq ayrim turoperator va agentlar mijozlari bilan aloqani uzib, ularni zarur yordam bilan ta’minlamayotgani qayd etilgan.
Departament ta’kidlashicha, ayrim operatorlar tezkor va ishonchli ma’lumot bermasdan, ijtimoiy tarmoqlarda turli videolar tarqatish orqali jamoatchilik fikrini manipulyatsiya qilmoqda. Shu bilan birga, ular o‘z majburiyatlarini bajarish o‘rniga sayyohlarni elchixonalar va konsulliklar zimmasiga qoldirmoqda.
Vazirlik eslatishicha, paketli sayohat xizmatlari odatda mehmonxonada joylashish, aviachiptalar, transfer va sug‘urta xizmatlarini o‘z ichiga oladi. Sug‘urta polisi shartlariga muvofiq, fors-major holatlarida yo‘lovchilarning turar joyi, transporti va evakuatsiyasi bilan bog‘liq barcha xarajatlar qoplanishi kerak.
Hozirda Yaqin Sharqda, xususan Qatar hududida qolgan O‘zbekiston fuqarolarini Ar-Riyod xalqaro aeroporti orqali evakuatsiya qilish bo‘yicha tashkiliy choralar ko‘rilmoqda.
Vazirlikning ma’lum qilishicha, Saudiya Arabistonidagi Dammam xalqaro aeroporti va Ar-Riyod aeroportlaridan xalqaro yo‘nalishlar bo‘yicha reyslar cheklovlarsiz amalga oshirilmoqda va chiptalar savdosi ochiq. Shuningdek, Jidda hamda Madina shaharlariga reyslar odatdagidek davom etmoqda.
Transport vazirligi turoperator va agentliklarni fors-major holatlarida ham iste’molchilar huquqlarini to‘liq ta’minlash, mijozlar bilan doimiy aloqada bo‘lish hamda mavjud reyslar orqali ularni xavfsiz hududlarga evakuatsiya qilish choralarini ko‘rishga chaqirdi.
