Yaqin Sharq davlatlaridan 14 mingdan ortiq o‘zbekistonlik qaytarildi — Transport vazirligi
Qaytarish operatsiyalari Yaqin Sharqdagi havo hududlari yopiq bo‘lgani sababli Saudiyadagi aeroportlar orqali amalga oshirilmoqda.
Transport vazirligi xabariga ko‘ra, Yaqin Sharqdagi harbiy harakatlar sababli Bahrayn, Quvayt, Suriya, Iroq, Eron, Qatar va Isroil havo hududlari yopiq bo‘lib, O‘zbekiston fuqarolarini vatanga qaytarish ishlari davom etmoqda.
Qayd etilishicha, 28-fevraldan 7-mart ertalab soat 10:00 holatiga ko‘ra, Madina va Jidda aeroportlaridan 63 ta parvoz orqali 13 543 nafar, Dubay aeroportidan 9 ta parvoz orqali 1 401 nafar fuqarolar olib kelingan. Xorijiy aviakompaniyalar orqali jami 1 365 nafar yo‘lovchi evakuatsiya qilingan, shundan 990 nafarini O‘zbekiston fuqarolari tashkil qiladi.
Qatar hududida qolgan fuqarolarni Saudiyaning Riyoz aeroporti orqali olib chiqish bo‘yicha tashkiliy ishlar davom etmoqda. Fuqarolarning aksariyati tur paketlar asosida kelgan.
Transport vazirligi turoperatorlar va agentlarni majburiyatlarini bajarishga, yo‘lovchilar bilan muntazam aloqada bo‘lishga chaqirmoqda. Sug‘urta polislariga muvofiq, fors-major holatlarida barcha xarajatlar qoplanishi shart.
Shuningdek, xabarda ayni vaqtda Kuvayt, Qatar va Bahraynga yaqin bo‘lgan Saudiyaning Dammam va Riyoz aeroportlaridan barcha xalqaro yo‘nalishlarda muntazam aviaqatnovlar cheklovlarsiz amalga oshirilmoqda va aviachiptalar sotuvi amalda mavjudligi qay etilgan.
