BAA prezidenti mamlakat “urush holatida” ekanini e’lon qildi
Dubaydagi dron hodisalari fonida Amirliklarda xavfsizlik choralar kuchaytirildi
BAA prezidenti Muhammad bin Zayd Ol Nahayon mamlakat Eron bilan keskinlik fonida “urush holatida” ekanini ma’lum qildi. Uning bayonoti 7-mart kuni Amirliklar davlat axborot vositalari orqali e’lon qilindi.
Davlat rahbari mamlakat qurolli kuchlariga minnatdorchilik bildirib, ular ushbu og‘ir vaziyatda davlat xavfsizligini ta’minlashda muhim rol o‘ynayotganini ta’kidladi.
“Biz urush holatidamiz. Bu vaziyat bizga majburan yuklatildi. Biz o‘zimizni, oilalarimizni va mamlakatimizni himoya qilish uchun harakat qilmoqdamiz”, — dedi prezident.
Shuningdek, u mamlakatda yashayotgan xorijiy fuqarolarning jamiyat rivojiga qo‘shayotgan hissasini ham yuqori baholadi.
Avvalroq, 7-mart kuni kechqurun Dubay shahridagi Marina Tower turar-joy binosiga dron zarbasi berilgani haqida xabarlar paydo bo‘ldi. Rasmiylar hodisa yuzasidan hozircha batafsil izoh bermagan.
Ma’lumotlarga ko‘ra, Dubayning Al Barsha tumanida havo mudofaasi tomonidan tutib qolingan obyekt parchalarining avtomobil ustiga qulashi oqibatida bir kishi halok bo‘lgan.
