Samarqandda Zulfiya mukofotini olgan shoiraga uy sovgʻa qilindi
Sovgʻa prezident topshirigʻiga asosan berilgan.
O‘zbekiston Prezidentining “Zulfiya nomidagi Davlat mukofoti bilan taqdirlash to‘g‘risida”gi qaroriga muvofiq, mamlakatning bir guruh faol va tashabbuskor xotin-qizlari nufuzli mukofot bilan taqdirlandi.
Mukofot sovrindorlari orasida Qashqadaryo viloyati Koson tumanida yashovchi iqtidorli shoira Latofat Amirova ham bor.
Yosh ijodkorning iste’dodi va ijodiy yutuqlari yuqori baholanib, Prezident topshirig‘iga asosan unga Samarqand shahrining Qorasuv massividan ikki xonali, barcha zarur sharoitlarga ega hamda mebellar bilan jihozlangan uy topshirildi.
Uy kalitini topshirish marosimida Samarqand viloyati hokimi Adiz Boboyev ishtirok etdi. Tadbir davomida viloyat rahbari yosh shoirani erishgan yutuqlari bilan samimiy qutlab, unga oilaviy xotirjamlik hamda kelgusidagi ijodiy faoliyatida ulkan muvaffaqiyatlar tiladi.
Ta’kidlanishicha, Zulfiya nomidagi Davlat mukofoti mamlakatda iqtidorli, faol va tashabbuskor qizlarni qo‘llab-quvvatlash, ularning ilm-fan, adabiyot, madaniyat va san’at sohalaridagi yutuqlarini rag‘batlantirishda muhim ahamiyat kasb etadi.
