“Urushni siz boshladingiz, biz yakunlaymiz” — Eron parlamenti raisi Trampga murojaat yo‘lladi
Uning ta’kidlashicha, urush davom etsa, neft bozori va mintaqa barqarorligiga jiddiy zarar yetishi mumkin.
Eron parlamenti raisi Muhammaboqir Qolibof X ijtimoiy tarmog‘idagi sahifasida Donald Trampga murojaat bilan chiqdi.
U o‘z bayonotida mintaqadagi keskinlik uchun AQSh aybdor deb hisoblashini bildirib, urushni AQSh boshlaganini, ammo uni Eron yakunlashini ta’kidlagan.
Qolibof shuningdek, urush davom etsa, bu nafaqat neft bozori, balki butun mintaqa va jahon iqtisodiyotiga jiddiy ta’sir ko‘rsatishi mumkinligini qayd etdi.
“Tramp avval neft narxi keskin oshmaydi degan edi. Endi esa narxlar ko‘tarilgach, tez orada yana barqarorlashishini aytmoqda. Agar urush shu tarzda davom etsa, na neftni sotish yo‘li qoladi, na uni ishlab chiqarish imkoniyati. Bu nafaqat AQSh manfaatlariga, balki mintaqa va butun dunyo manfaatlariga ham zarar yetkazadi”, — deb yozgan u.
Shuningdek, Eron parlamenti raisi bu jarayonda Benyamin Netanyaxuning siyosatini ham tanqid qilgan.
“Bu urushni siz boshladingiz, ammo uni Islom Respublikasi yakunlaydi”, — deya ta’kidlagan Qolibof.
