Buyuk Britaniyaning ikki kunlik gaz zaxirasi qoldi
Energiya bozoridagi uzilishlar sabab London gazni yuqori narxlarda sotib olishga majbur bo‘lmoqda.
Buyuk Britaniyada gaz zaxiralari keskin kamaygani ma’lum qilindi. Bu haqda National Gas ma’lumotlariga tayanib Daily Mail nashri xabar berdi.
Operator ma’lumotlariga ko‘ra, Buyuk Britaniya gaz omborlarida hozirda taxminan 6700–7000 gigavatt-soat gaz qolgan. Bu ko‘rsatkich bir yil avvalgi zaxiralardan ancha past bo‘lib, mamlakatning ichki ehtiyojini atigi bir yarim-ikki kun davomida qoplashga yetishi mumkin.
Nashrning yozishicha, mavjud vaziyat sabab London gazni xalqaro treyderlardan yuqori narxlarda sotib olishga majbur bo‘lmoqda. Hozirda Buyuk Britaniya Yevropada tabiiy gaz uchun eng yuqori ulgurji narx to‘layotgan davlatlardan biri hisoblanadi. Shu bilan birga, bir qator Yevropa mamlakatlari bir necha haftalik gaz zaxirasiga ega bo‘lgani sababli ta’minotdagi uzilishlarga tayyor.
Energetika bozoridagi vaziyatga doir fikr bildirgan Aleksandar Vuchich Yevropa Rossiya neftidan voz kechish qarori uchun yuqori narx to‘layotganini ta’kidlagan. Uning so‘zlariga ko‘ra, Rossiya neftini Osiyo, Afrika va Amerika davlatlari sotib olayotgan bir paytda Yevropa siyosiy sabablar bilan undan voz kechmoqda.
Shu bilan birga, The Wall Street Journal nashrining yozishicha, Yaqin Sharqdagi keskin vaziyat fonida Yevropa davlatlari Rossiya bilan energetika aloqalarini tiklash masalasini qayta ko‘rib chiqishi mumkin. Tahlilchilarga ko‘ra, so‘nggi kunlarda ayrim energiya tankerlari Yevropa yo‘nalishidan voz kechib, Osiyo bozorlariga yo‘naltirilgan.
Avvalroq Vladimir Putin ham Rossiya uchun Yevropa bozoriga gaz yetkazib berishni to‘xtatib, boshqa rivojlanayotgan bozorlar bilan hamkorlikni kengaytirish iqtisodiy jihatdan foydaliroq bo‘lishi mumkinligini bildirgan edi.
