Eronning yangi Oliy rahbari AQSh roziligisiz uzoq vaqt qolmaydi — Tramp
AQSh prezidenti Eronning yadroviy qurolga ega bo‘lishiga yo‘l qo‘yilmasligini ham ta’kidladi.
AQSh prezidenti Donald Tramp Eronning keyingi Oliy rahbari masalasida bayonot berdi. U ABC News telekanaliga bergan intervyusida Eron rahbari Vashingtonni rozi qilishi kerakligini ta’kidlagan.
“U bizning roziligimizni olishi kerak bo‘ladi. Agar bunday bo‘lmasa, u uzoq vaqt hokimiyatda qolmaydi. Biz bu masalani har 10 yilda qayta ko‘rib chiqishga majbur bo‘lishni istamaymiz”, — dedi Tramp.
AQSh prezidenti Eronning yadroviy dasturi Vashington uchun asosiy masalalardan biri ekanini qayd etgan. Uning so‘zlariga ko‘ra, AQSh Eronning yadroviy qurolga ega bo‘lishiga yo‘l qo‘ymaydi va bu boradagi xavfsizlik choralarini qat’iy nazorat qiladi. Tramp, shuningdek, zarurat tug‘ilsa, uran bilan bog‘liq vaziyatni nazorat qilish uchun Eron hududiga maxsus kuchlar yuborish ehtimolini ham istisno etmagan.
Amerika yetakchisi shu bilan birga, agar Eron tomonidan maqbul nomzod tanlansa, u Tehron rejimi bilan aloqador bo‘lgan ayrim nomzodlarni ham ma’qullashi mumkinligini aytgan. “Agar bu yaxshi rahbarni tanlashga olib keladigan bo‘lsa, buni qilishim mumkin. Bu talabga javob beradigan bir nechta odam bor”, — degan u.
Trampning fikricha, Eron mintaqadagi ta’sirini kengaytirishga harakat qilmoqda. U Tehron “butun Yaqin Sharqni egallashni rejalashtirganini” aytib, AQSh va Isroil tomonidan amalga oshirilgan harbiy operatsiyalar bunday rejalarni to‘xtatishga xizmat qilganini ta’kidladi. Shu bilan birga, u harbiy operatsiyalar qancha davom etishi haqida aniq muddat ayta olmasligini, biroq AQSh harbiylari “rejadagidan tezroq harakat qilayotganini” bildirgan.
