O‘zbekistondagi Islom sivilizatsiyasi markazi nufuzli xalqaro Condé Nast Traveler nashrida e’tirof etildi
Jurnal tomonidan e’lon qilingan yangi reytingda Toshkent shahri va Islom sivilizatsiyasi markazi iyun oyida sayohat qilish uchun tavsiya etilgan yo‘nalishlardan biri sifatida qayd etildi.
Toshkent shahri va O‘zbekistondagi Islom sivilizatsiyasi markazi dunyoning yetakchi sayohat jurnallaridan biri — Condé Nast Traveler tomonidan e’lon qilingan “The Best Places to Visit in June, From Route 66 to Uzbekistan” (“Iyun oyida sayohat qilish uchun eng yaxshi manzillar: Route 66 dan O‘zbekistongacha”) nomli materialida iyun oyida tashrif buyurish tavsiya etilgan eng yaxshi yo‘nalishlar qatoriga kiritildi.
Nashrda ta’kidlanishicha, Markaziy Osiyoning eng yirik shaharlaridan biri bo‘lgan Toshkent o‘zining ko‘p asrlik tarixi davomida turli sivilizatsiyalar ta’sirida shakllangan noyob madaniy muhitga ega. Buyuk Ipak yo‘li davri, arab sulolalari va keyingi tarixiy bosqichlarning madaniy izlari bugungi kunda ham shahar me’morchiligi va madaniy qiyofasida yaqqol namoyon bo‘lib turibdi. Ipak yo‘li davriga oid ko‘k gumbazli yodgorliklardan tortib sovet modernizmi uslubidagi me’moriy inshootlargacha bo‘lgan rang-barang manzaralar shahar tarixiy qatlamlarining uyg‘unligini aks ettiradi.
Maqolada, ayniqsa, O‘zbekistondagi Islom sivilizatsiyasi markaziga alohida e’tibor qaratilgan. Ta’kidlanishicha, ushbu yirik madaniy-ma’rifiy majmua islom madaniyati, ilm-fani va ma’naviy merosi tarixiga bag‘ishlangan muzey, ko‘rgazma va ta’lim maydonlarini o‘z ichiga oladi. Mualliflar fikriga ko‘ra, mazkur markazning barpo etilishi O‘zbekistonning jahon madaniy makonidagi o‘rnini mustahkamlashga qaratilgan muhim tashabbusdir.
Shuningdek, nashr Toshkentda zamonaviy madaniy muhitning jadal rivojlanayotganiga ham e’tibor qaratadi. Jumladan, Zamonaviy san’at markazining ochilishi hamda poytaxtning tarixiy mahallalarida xalqaro badiiy rezidensiyalarning paydo bo‘layotgani qayd etiladi.
Ta’kidlash joizki, O‘zbekistondagi Islom sivilizatsiyasi markazi haqida avval ham Smithsonian Magazine, BBC Travel, BBC History va National Geographic kabi nufuzli xalqaro nashrlarda maqolalar e’lon qilingan. Ushbu materiallarda markaz jahon miqyosidagi yirik muzey tashabbuslari — Los-Anjelesdagi Lucas Museum of Narrative Art, Vashingtondagi National Geographic Museum of Exploration hamda Londondagi London Museum kabi muassasalar bilan bir qatorda tilga olinmoqda.
Toshkent shahri va O‘zbekistondagi Islom sivilizatsiyasi markazining nufuzli xalqaro jurnal tomonidan tavsiya etilgan sayohat yo‘nalishlari ro‘yxatiga kiritilishi jahon hamjamiyatining O‘zbekistonning boy madaniy merosi va sayyohlik salohiyatiga bo‘lgan qiziqishi ortib borayotganidan dalolat beradi. Bu e’tirof mamlakatning Markaziy Osiyodagi muhim madaniy va turistik markaz sifatidagi mavqeini yanada mustahkamlashga xizmat qiladi.
Ma’lumot uchun, Condé Nast Traveler sayohat va madaniyatga ixtisoslashgan eng nufuzli xalqaro nashrlardan biri bo‘lib, 1987-yilda AQShda tashkil etilgan. Jurnal Condé Nast media xoldingi tarkibiga kiradi. Ushbu xolding Vogue, The New Yorker va GQ kabi mashhur jurnallarni ham nashr etadi. Nashrning global oylik auditoriyasi 16 milliondan ortiq o‘quvchini tashkil etadi va u jahon turizm industriyasi uchun muhim yo‘naltiruvchi manbalardan biri hisoblanadi.
