Samarqandda kadastr xodimi, Surxondaryoda sobiq soliqchi pora bilan ushlandi

Huquqni muhofaza qiluvchi organlar tomonidan o‘tkazilgan tezkor tadbirlar davomida kadastr xodimi hamda sobiq soliq inspektorining firibgarlik bilan bog‘liq noqonuniy harakatlari aniqlanib, ular qo‘lga olindi. Bu haqda DXX Zamon.uzga xabar berdi.

 

Ma’lum qilinishicha, Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda Davlat kadastrlari palatasining Pastdarg‘om tumani filialida faoliyat yurituvchi kadastr muhandisi noqonuniy ravishda pul olgan vaqtida ushlandi.

 

Aniqlanishicha, u o‘zining vakolatli tanishlari orqali mahalliy fuqaroga tegishli 2 sotix yer maydonining kadastr pasportini davlat ro‘yxatidan o‘tkazib berish evaziga 2,5 ming AQSh dollari talab qilgan va pulni olgan vaqtida qo‘lga olingan.

 

Mazkur holat yuzasidan unga nisbatan O‘zbekiston Respublikasi Jinoyat kodeksining 168-moddasi 3-qismi “v” bandi hamda 211-moddasi 1-qismi bilan jinoyat ishi qo‘zg‘atilib, ehtiyot chorasi sifatida qamoq qo‘llanilgan.

 

Shuningdek, Surxondaryoda o‘tkazilgan yana bir tezkor tadbir davomida Davlat soliq qo‘mitasining Sherobod tumani davlat soliq inspeksiyasining sobiq bosh inspektori qo‘lga olingan.

 

Ma’lumotlarga ko‘ra, u viloyat iqtisodiy sudida ko‘rib chiqilayotgan ish doirasida bog‘dorchilikka ixtisoslashgan fermer xo‘jaligiga nisbatan egalik huquqini tiklab berish evaziga 10 million so‘m talab qilib, pulni olayotgan vaqtida ashyoviy dalillar bilan ushlangan.

 

Mazkur holat yuzasidan ham Jinoyat kodeksining 168-moddasi 3-qismi “v” bandi bilan jinoyat ishi qo‘zg‘atilib, gumonlanuvchiga nisbatan qamoq ehtiyot chorasi qo‘llanilgan. Hozirda tergov harakatlari davom etmoqda.